قصيدة للشاعر كامل بن هليل – الله كريم –


قصيدة للشاعر كامل بن هليل – الله كريم –



الله كريم وكل ضيق انفراجه
على الرحيم اللي دعوه المصلين
قم صل للخالق وسبح وناجه
يا فات من ليل المخاليق ثلثين
تبغى علاج الضيق هذا علاجه
وحق الذي جوله حجيجه ملبين
وما غابت الاجواد فزعه وحاجه
ياما بهم من هبة الريح واللين
اقلوبهم صبح يسر انبلاجه
وصدورهم للطيب وسع الحمادين
والطيب اللي طاب طلق حجاجه
يسوي من اللي عكس طبعه ملايين
خاطرك يا شفته يزيد ابتهاجه
لو كان لك مع ضيقة الصدر عامين
يا صار وسع الارض عنق الزجاجه
وشانت على وجه الزمان التلاوين
ولع على ليلة ظلامك سراجه
له وقفة يذكر بها علمه الزين
قراح طيبه عذب ما هو هماجه
في خوته ترجح رجال وميازين
مايحكمه ظرفه ولا هو مزاجه
للطيب تلقابه شموخ وعناوين
مثل الربيع اللي زهوره دماجه
يسرح به الخاطر وتفرح به العين
يا جيت لو ما كنت طلاب حاجه
يقول لك  بالله تامر على شين
هذاك يفداه الردي واللجاجه
اللي سوالفهم الغاز وسكاكين
الناس معهم كل ابوهم عواجه
واحدهم منزه عن العيب والشين
يا شاف مسكين يزيد انحراجه
فزع مع صدوف الزمان المعاوين
ون شاف نعمه ثار تحته عجاجه
قام يتلفت ليه ؟ هذه .. له منين ؟
من الكريم اللي وساع فجاجه
ماهي من جيوبك ولا لك بها دين
متوارثين الحقد هو والسماجه
في نقله الشينه نشاما وعجلين
خويهم لو مال وقته وماجه
ما ينفعونه  يتركونه  مقفين

4 التعليقات

إنتقل إلى نموذج التعليقات

    1. 1
      عقيل العنزي

      صح لسانك عمي ابو سلطان وعلا شانك

      الرد
    2. 2
      شمالي/عرعر

      صح لسانك قصيده جزله من جزل

      الرد
    3. 3
      خالد هايل السويلمي

      اعجبتني… وكامل الهليل هو معدن نادر في هذا الوقت.

      الرد
    4. 4
      ابوزياد

      اقلوبهم صبح يسر انبلاجه

      وصدورهم للطيب وسع الحمادين

      صح لسانك ابوسلطان يامتألق

      الرد

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *